Bu "plonka"ların 150 manat cəriməsi var - DYP-dən sürücülərə xəbərdarlıq

Bu gündən etibarən avtomobillərin arxa qapılarındakı şüşələrə yalnız sənaye üsulu ilə hazırlanan jalüz və pərdələrin vurulmasına icazə verilir.

BEŞ.AZ xəbər verir ki, bu barədə Lent.az-a açıqlama verən Bakı şəhər Dövlət Yol Polisi İdarəsinin İctimai qurumlarla əlaqə bölməsinin rəisi, polkovnik Vaqif Əsədov bildirib ki, yüngül minik nəqliyyat vasitələrində kütləvi görünüşü məhdudlaşdıran, şəffaflığı korlayan pəncərələrin, "plonka"ların istifadə edilməsi müvafiq xəta hərəkəti yaradır:

"İsti hava şəraiti ilə əlaqədar konkret standartlaşma tətbiq edilir. Bu standart mayın 1-dən noyabrın ayının 15-ə qədər yüngül minikli nəqliyyat vasitələrinin arxa və qapı şüşələrinə jalüz və "ştor"lar vurula bilər. Lakin, avtomobillərin güzgülərinə buqələmun rəngdə şüşələrin vurulması inzibati xəta tərkibi yaradır. Eyni zaman da qapıların şüşələrinə hər hansı formada və ölçüdə işıq buraxmayan "plonka"ların vurulması inzibati xəta hesab olunacaq. Yalnız və yalnız sənaye üsulu ilə hazırlanmış, əhali arasında "ştor" kimi tanınan qara rəngli, dairəvi dəlikləri olan və plastmas olan materiallar olmalıdır. Sürücülər bunları mütləq nəzərə almalıdır".

Vaqif Əsədov onu da qeyd edib ki, tələbləri pozan sürücülər 150 manat cərimə olunacaq.