Prezident İlham Əliyevin rəhbərliyi ilə həyata keçirilən gələcəyə hesablanmış uğurlu iqtisadi siyasət Azərbaycanı daha güclü edir və beynəlxalq mövqelərinin möhkəmlənməsinə töhfələr verir. Məhz bu gün iqtisadiyyatın dinamik inkişafı və əldə edilən nəticələr bunu deməyə imkan verir.
Sentyabrın 26–da keçirilmiş iqtisadi məsələlərə həsr olunmuş müşavirədə dövlət başçısı İlham Əliyev bir daha bildirdi ki, əsas hədəfimiz iqtisadiyyatımızı bundan sonra daha da şaxələndirmək və dayanıqlı inkişaf modelini təkmilləşdirməkdir .Dövlət başçısı İlham Əliyev yeni dövrün yeni hədəflərini açıqlayarkən bu mühüm məqamı xüsusi qeyd edir ki, bunlara nail olmaq üçün iqtisadiyyatımız inkişaf etməlidir. Suverenliyimizin bərpası ilə Azərbaycanın qarşısında yeni imkanlar, üfüqlər açıldı. Dövlətimizin siyasətində ölkəmizin hərtərəfli inkişafının prioritetliyi və bunun üçün kompleks tədbirlərin həyata keçirilməsi bu imkanların bütün sahələrdə yaranmasını şərtləndirdi. Təbii ki, bütün inkişafın əsasında iqtisadi tərəqqi dayanır.
Müşavirədə dövlətimizin başçısının səsləndirdiyi rəqəmlər ölkənin iqtisadi inkişafının real mənzərəsinin güzgüsüdür: “Belə ki, 8 ayda iqtisadi artımın 4,3 faiz, qeyri-neft sektorunda 7 faiz, xarici dövlət borcunun ÜDM-in 7,5 faiz, inflyasiyanın ilin əvvəlindən cəmi 1 faizdən bir qədər çox olması dünya ölkələri arasında qabaqcıl göstəricidir. Bu gün iqtisadi inkişaf dinamikasının qorunması üçün neft-qaz sektorunda fəaliyyət göstərən xarici şirkətlərin qarşısına qoyulmuş tələblər hasilat dinamikasının qorunub saxlanılmasına və hərbi sənaye kompleksinin inkişaf etdirilməsinə kömək edəcək. Həmçinin iqtisadiyyatın diversifikasiyasının genişləndirilməsi ölkədə iqtisadi artım templərinin qorunub saxlanılmasına imkan verəcək”.
Prezident İlham Əliyevin rəhbərliyi ilə açılışı olmuş sənaye və aqroparklarda, o cümlədən işğaldan azad olunmuş ərazilərdə Ağdam Sənaye Parkının, “Araz Vadisi İqtisadi Zonası” Sənaye Parkının və yeni müəssisələrin açılması həm doğma yurdlarına qayıdan keçmiş məcburi köçkünlərin məşğulluq məsələlərinin həllini, həm də işğaldan azad olunmuş ərazilərin iqtisadi potensialının ölkə iqtisadiyyatına reintiqrasiya olunmasını sürətləndirir.
Müşavirədə dövlətimizin başçısının qeyd etdiyi kimi iqtisadi inkişafla bağlı müəyyən olunmuş məsələlər qarşıya qoyulmuş vəzifələrin uğurla icra olunmasına və ölkəmizin daha da güclənməsinə yol açacaq. Belə ki, hərbi gücün artırılması, hərbi sənaye kompleksinin inkişaf etdirilməsi, sərhədlərin təhlükəsizliyinin möhkəmləndirilməsi, iqtisadi və sosial siyasətin uğurla davam etdirilməsi, Qarabağ və Zəngəzurda yenidənqurma və bərpa işlərinin sürətlə aparılması və s. qarşıdakı dövrdə icra olunması üçün müəyyən edilmiş vəzifələrdir.
Sosial siyasətin uğurla davam etdirilməsi müəyyən olunmuş vəzifələr arasında həmişə öndə olub. Ölkəmizdə vətəndaşların layiqli yaşamasının təmin olunması və sosial sahədə islahatların davam etdirilməsi hər zaman diqqət mərkəzində saxlanılır. Belə ki, 2018-ci ildən 4 milyon insanın sosial rifahının yaxşılaşmasına xidmət edən sosial paketlərin uğurla icra olunması, son 5 ildə minimum əməkhaqqının 2,7 dəfə, minimum pensiyanın 2,5 dəfə artırılması ölkədə aparılan sosial siyasətin uğurla davam etdirildiyini göstərir. Dövlətimizin başçısının gələn ildən minimum pensiya və minimum əməkhaqqının artırılması ilə bağlı səsləndirdiyi fikirlər sosial siyasətin həmişə prioritet olduğunun göstəricisidir. Qarabağ və Qərbi Zəngəzurun yenidən qurulmasına və bərpasına ilin sonuna qədər xərclənməyə nəzərdə tutulan vəsaitin 19 milyard manata çatdırılması ermənilərin 30 il dağıdaraq məhv etdikləri ərazilərin yenidən dirçəldilməsi və “Böyük Qayıdışa dair I Dövlət Proqramı”nın uğurla icra edilməsinin göstəricisidir.
Müşavirədə müzakirə olunmuş məsələlər və dövlətimizin başçısının müvafiq qurumlara verdiyi tapşırıqların uğurla icra olunması iqtisadiyyatın və ümumilikdə ölkəmizin daha da güclənməsini təmin edəcək.
Əli Novruzov
Salyan şəhəri, “KROL №1” MMC-nin sədri
